Covid-19 Medical Team-in Sangau an tlawh

Covid-19 Medical Operational Team (MOT) leh Indian Medical Association (IMA) Mizoram Branch aiawhte chuan nimin khan MOT chairman Dr ZR Thiamsanga, MLA, Health & Family Welfare Board vice chairman ni bawk hoin Lawngtlai district-a Myanmar ramri hnaih Sangau leh a chhehvel khuate an tlawh a; damdawi-inte an tlawh bakah khawtlang hruaitute nen an inkâwm.

Covid-19 MOT leh IMA aiawhte hian kar hmasa tawp lam aṭang khan a thawh hnihna atan hmun pali-ah inṭhenin, Mizoram ramri bul hnaia khaw hrang hrang an fang kual leh a ni.

Covid-19 MOT hian Sangau, Pángkhua, Thaltláng leh Sentetfiang khuate an tlawh a; Dr ZR Thiamsanga chuan khawtlang duty-te chu Covid-19 chungchang a hrilhfiah a, fimkhur taka duty kalpui a, thâ thlah loa ṭan la chhunzawm zel turin a chah.

Dr ZR Thiamsanga chuan, Sangau leh a chhehvel chu Myan­mar rîa awm an nih avang leh Myanmar-a Chin state-ah Covid-19 vei an awm nual tawh avangin ramri ven chu ngawrh lehzuala chhunzawm a ṭul thu a sawi a; task force hrang hrangte hnenah hripui laka invenna hmanrua ṭhahnem tak an pe a ni.

Sangau RD block chhunga Indo-Myanmar border-ah kal khàn, vèn ngai hmun pakuaah a awm a, chu'ngte chu Sangau leh a chhehvela khuate'n ramri-ah riah chilhin an véng mek.

Medical Team hian Sangau damdawi-in (primary health centre) tlawhin, damdawi-in tur sak thar mek a hmunah an en a, damlote a tlawh nghal bawk.

Sangau leh a chhehvel tlawhtu Covid-19 MOT-ah Dr C Sangzuala, Dr Lalrintluanga Jahau leh Dr Zoramdinthara te an tel a ni.