Sipai tan tum Mizo thalaite zingah medical Paltlang zo lo an tam - Recruiting Director

Aizawla sipai lâk rûnpui neih mekah physical test-ah mi 1,100 vel an tling a, mahse, chu'ng zinga a zatve vel chuan chhan hrang hrang vangin medical test an patlang zo lo. Army recruiting director Colonel Manish Natu chuan, Mizo ṭhalai sipai ṭan tum zinga medical test patlang zo lo zat percentage chu state dang ngaihtuahin a sang hle tih Vanglaini a hrilh.

Sipai lâk rûnpui neih mekah hian mi 3,000 chuangin online hmangin registration an ti a, an zinga 1,100 vel chuan physical test paltlangin, chu'ng zinga a zatve vel chu endik an nih hnuah medical test-ah an tla.

Manish Natu sawi danin, medical test paltlang zo lo zinga 40% chu kuhva, supari leh thil ṭha lo dang ei nasat vang leh mei an zûk nasat vanga an lei dum lutuk leh ha fai lo leh dik lote an ni a; 30% vel chu ruihhlo an lo tih ṭhin tawh avangin an taksaa ruihhlo hmanga inchiuna hnûhmá hmuh a nih vanga medical test-a hnâwl an ni thung.

Hnawl zinga 15% vel chu lirtheia chetsualna vanga an taksa hmun hrang hrang felhlel vanga hnawl an ni a, 10% aṭanga 15% vel chu medical test tih nía zu rim nama an kal vanga hnawl niin, a bak zawng chu tattoo neih vanga hnâwl an ni.

Recruiting Director chuan, Mizo ṭhalai zinga medical test paltlang zo lo an tam lutuk chu pawi a tih thu sawiin, "Lirthei chak tak taka tlan vangte leh taksa tana ṭha lo an tih vanga ṭhalai tam takin hna an chán tur hi pawi ka ti hle. Physical-ah chuan an ṭha lutuk a, thil harsa tak tak an paltlang thei a, chumi hnuah medical-a an tla hi a pawi hle," a ti.

Sipai chu India rama hna ṭha berte zinga mi a nih thu sawiin Manish Natu chuan, "Mahni taksa tana ṭha lo thil tih vangte leh ṭangkaina nei lo tattoo chhut vanga thla tin Rs. 40,000 vel leh hamṭhatna dang tam tak an chán mai hi ka uipui hle," a ti a; sipaia ṭang tur chuan taksa ṭha taka vawn a pawimawh thu a sawi.

Manish Natu sawi danin, document felfai lote chu an intihfelna tur hun pek an ni a, mahse, medical test-a tling lote chu ngaihnathiamna pek theih an ni lo.

Recruiting Director chuan, Mizo ṭha-laite sipaiah tam zawk an ṭan theihna atan inzirtirna uar zawka kalpui a pawimawh thu sawiin, "Hna ṭha tak Mizo ṭhalaite'n an thawh theih nan a theih ang anga ṭhalaite hnenah awareness pek a ṭul. Medical test paltlang theih lohna chhan hrang hrangte an neih lohna turin ṭhalaite an invawn a ṭul a ni," a ti.

Zawhna chhangin Manish Natu chuan, state danga sipaia ṭan tum zingah medical test paltlang zo lo percentage a sang lo a, Mizoram hnaih bertu Nagaland-ah chuan 40% velin an paltlang zawh loh thu a sawi.