NE hmasawnna tur sum a la awm reng

Union finance minister Arun Jaitley chuan nimin chawhma lam khan, Economics Editors' Con-ference 2016 chu, PIB building Delhi-a National Media Centre-ah a hawng a; he hunah hian 1988-a sorkar laipuiin hmar-chhak tana sum a dah hran chu hai chhuah theih a la nih reng thu a sawi.

Mizoram aṭanga kalte zawhna chhangin, Central Gross budget atanga 10%, NE bial chhunga hmasawnna hna thawhna tura PM Deve Gowda hunlai 1988-a dahhran chu NLCPR-ah a la awm reng a, state sorkarten DoNER ministry-a scheme an siam chak dan mila pek ṭhin a ni, tiin secretary, Finance Ashok Lavasa chuan a sawi.

Rs 500 leh Rs 1000 note tihthih leh a nghawng chuan zawhna hun tam ber a luah a, Finance minister chuan, pawisa note chi thar siam chhuah a ni ang a, cheng 100 note chin hnuai lam, tuna awm mekte hi a hman theih chhunzawm zel ang a, mipui harsatna siam loin zawi zawia thlakthleng vek a ni ang tih a sawi.

Rs 500 leh Rs 1000 note tihthih thut vanga mipuiten buaina tlem azawng an tawk chu pawi a tih thu a sawi pahin, hun lo kal tura ram pum himna leh hmasawnna atan, ni hnih/khat chhung buaina hi mipuite hian ram tana an inpekna a ni tih pawm turin a ngen zui.

Goods and Service Tax (GST) la tura sorkar inbuatsaihna chu a tluang zel tih sawiin, ruahman lawk anga bul tan theih a beisei thu minister chuan a sawi bawk.

Tun tum economic editors' conference-ah hian, Delhi pawn atanga kalte tan zawhna leh chhanna hun hmasa lam pek an ni a, zawt tura hratlak inchuh nuai nuai a awm lo.

He conference hian ni hnih a awh ang a, vawiinah zawh a ni ang. Mizoram atangin The Aizawl Post editor Lalram-buatsaiha leh Vanglaini editor K. Sapdangate an tel a ni.