Hmasawnna turah kan inren dawn lo: CM

Chief minister Lal Thanhawla chuan, Mizoram sorkar chu sum leh paiah harsa mah se, Mizoram hmasawnna tura hmalakna kawngah inrenchem an tum loh thu a sawi.

Mizoram Finance & Accounts Service (MFAS) Association-in nimina Tourist Lodge, Chaltlanga inkhawmpui an neih a hmanpuinaah thu sawiin Chief Minister chuan, "Mizoram sorkar hi mipuite ban phâk, langtlang leh rin ngam sorkarah siam mek a ni. Sorkarin sum lamah harsatna nei mah se, hmasawnna tura hmalakna kawngah chuan inrenchem a tum lo," a ti.

Lal Thanhawla chuan, rambuai vangin kum 20 chhung mi dangte hnunga kal tawh Mizoramin mi dangte ruala ke a pên ve theih nan sum enkawlna felfai leh sum hman dan tur ruahmanna awmze neia duan a ngai tih a sawi a; chuta tan chuan sum khawih lama mithiamte'n mawhphurhna pawimawh tak an neih thu a hrilh.

Project siam leh thehluhah Mizoramin harsatna lian tham a neih tawh loh thu sawiin CM Hawla chuan, "Hna thawhna tur sum sorkar laipui aṭanga rawn lut tawhte pek chhuah erawh kut tling loa sum hmuh tumtute vangin tihkhawtlai a ni fo. Sanction theitute chuan financial control hnuaia inkaihhruaina bihchiang hmasain, hna thawhna tur sumte chu pek chhuah a hun veleh an pe chhuak nghal zel tur a ni," a ti.

MFASA inkhawm-puiah hian chawhnu lamah an pawl hruaitu thar an thlan bakah, an pawl inrêlbawlnaa thil pawimawh hrang hrang an sawiho a ni.