KHAWTHLIR

Railways Minister Lo zin dawn

Sorkar laipuia Railways minister Suresh Prabhakar chu vawiin hian Mizoramah a rawn zin dawn. Railways Minister hian chawhma dar 10-ah Sairangah Railways station building sak tur lungphùm a phúm dawn a; governor Lt.Gen. Nirbhay Sharma leh chief minister Lal Thanhawla te pawh an tel ang.

Thisen pe

Industrial Training Institute (ITI), Aizawla Red Ribbon Club-te chuan nimin khan an hmunah blood donation camp an huaihawt a, Aizawl Civil Hospital tan mipa 58 leh hmeichhia parukte'n thisen unit 64 an pe. Nimin vek khan BSF 148 Battalion leh 99 Battalion-te chuan Lunglei Civil Hospital tan thisen unit 51 an pe bawk.

Games khar

Ministry of Tribal Affairs leh Sports & Youth Services department-te bultuma Lunglei Zotlang muala Mizo Traditional Games buatsaih chu nimin khan khâr a ni. Games-ah hian Mizo infiamna hrang hrang - inbuan, kalchhet, arpa insual, ketaminu intlansiak, insuknawr, inhruipawh, insaihruipawh, inkawibah leh sairawkherh perh hmangtein intihsiak a ni.

Art hmasawnna tur buaipui

Mizorama art tihhmasawnna tur programme ‘Difference screen’ chu nimin khan Art Novelty Gallery, Chaltlangah neih a ni a, England aṭangin art lama mithiam Bruce Alan, Artspace Bristol leh Bristol Sculpture Lead dintuin a hmanpui. He hunah hian Mizoram University leh high school zirlaite an tel a ni.

AIR souvenir

All India Radio (AIR), Aizawlin an kum 50-na, golden jubilee puala souvenir an buatsaih chu nimin khan AIR pisa kawtah minister Lalsawta'n a tlangzarh.