ICFAI University-in zirlai thlahna hun hmang Skill development-ah nasa zawka hmalak a ni - Larsap

ICFAI University (Mizoram) chuan nimin khan an college-ah convocation vawi ngana an hmang a; khuallian, Governor Lt.Gen. Nirbhay Sharma-a'n gold medalist leh silver medalist mi 109 hnenah medal leh thuchei a hlân. Larsap chuan skill development lamah nasa zawka hmalak a nih thu a sawi.

Larsap chuan, "Zirna bakah skill dvelopment lamah nasa zawka hmalak mek a ni a, chuvangin zirlai leh ṭhalaite pawh hmasawnna lo kal zel tur mila zirna leh thiamna pek a finthlak. Kan thiamna leh hnathawh danah hian kan mihringpuite, khawtlang, ramchhung leh khaw-vel pum thatna leh hmasawnna tura kan theihtawp kan chhuah zel hi kan mawhphurhna ṭheuh a ni tih i hre reng ang u," a ti.

Governor chuan graduate tharte fuihna thu sawiin, "Tuna in hlawhtlinnaah tawp mai lo a, in nun bul ṭanna a ni tih hriain theihtawp chhuah zel ang che u. Tunlai khawvelah mithiam leh chhawrtlak tak takte tan lo chuan hmun a awm tawh lo. India hi ram ṭhang chak tak a ni a, hnathawhna tur pawh a tam. Mizo ṭhalai lehkhathiam leh taima tak takte tan tun hun ṭha hi bawh nachang hria a, tumruhna nen ram chhung leh páwn thlenga hming chher theih a ni," a ti.

Sorkarin mipuite tan theih-tawp a chhuah zel tih sawiin Larsap chuan, "Zirna bakah themthiamna (skill dvelopment) lamah nasa zawka hmalak mek a ni a, zirlai leh ṭhalaite pawh hmasawnna lo kal zel tur mila zirna leh thiamna pek a finthlak a ni," a ti a; thiamna leh hnathawh danah mihringpui te, khawtlang, ram chhung leh khawvel pum ṭhat-
na leh hmasawnna tura theihtawp chhuah zel a pawimawh tih hre reng turin zirlaite a chah.

ICFAI University hnuaiah hian university 11, business school pakua, technology school pasarih leh law school panga a awm mek a ni.