Missionary nuai 1 tirh tumte Pathianin Min sorkartir ngei ang - Zoramthanga

MNF president Zoramthanga chuan, kum 2018-a Mizoram inthlanpui awm turah MNF party a sorkar ngei dawn niin a sawi a, "Missionary nuai chuang tirh tumte hi Pathianin min sorkartir ngei ang," a ti.

Zoramthanga hian nimina Aizawl South-II MNF Block Conference, Thakthing Zawlbuka neihah thu sawiin, Mizoramin America inthlanah zir tur tam tak a nei niin a sawi a, "Donald Trump hi America mipui Kristian 80% chuangin an vote a, Pathian ṭih mi a nih vanga tling a ni. America inthlan result ang hian kum 2018 inthlanpuiah pawh keini missionary nuai chuang tirh tumte hi Pathianin min sorkartir ngei ang," a ti a; Congress party chu an hotu berte'n Pathian pawi an sawi bakah, Mizorama an hotute pawhin nasa takin Pathian pawi an sawi niin a sawi.

MNF President chuan, "Pathian leh mipui zarah kan sorkar ang a, Delhi-a púr châwk leh FCI kudam ngai tawh loin, lei hnuai leh lei chung hausakna hâi chhuakin kan ram hausakna pár kan tlân tawh ang," a ti. Mizoram chu lehkha thiam tamna ram leh Kristian ram a ni tih sawiin, "Kan ram hectare 70,000 chauh pawh khâwl hmangin leiletah kan siam ang a, ei leh barah kan intodelh em em ang. 'Pathian leh kan ram tan' tih hi
ṭawngkam satliah mai ni loin, a takin kan nunpui ang," a ti bawk.

Aizawl South-II Block Conference rual hian Zoram zalenna puanna hmun hriatrengna lungphun Zoramthanga'n a hawng a; party hrang hrang aṭangin mi thar 43 an lawm lut bawk niin MNF thuchhuah chuan a tarlang.