Covid-19 laka invènna atana him lo Hand sanitiser hmuh chhuah a ni

Health Services joint director (Food & Drugs Administration) Lalsawma chuan, Covid-19 venna atana him lo hand sanitiser (sub standard) Mizoramah lak luh a ni tih hmuh chhuah a nih thu Vanglaini palai a hrilh.

Lalsawma chuan, hand sanitiser chu Covid-19 laka invènna hmanraw pawimawh tak pakhat a nih thu sawiin, "Mamawhna pawh a sang a, chuvang chuan India ram hmun hrang hrangah siam chhuah pawh a tam ta hle. Hetih mek lai hian, a pawimawhna hi tute'n emaw remchangah hmangin, Drugs & Cosmetics Act, 1940-in standard a tih chin ngai pawimawh loin an siam a, an thehdarh nasa hle a ni," a ti.

Hand sanitiser ṭha tâwk lote chu Mizoramah pawh lak luh ve a ni tih hmuh chhuah a nih thu sawiin Lalsawma chuan, "Damdawi zuarte'n mipui mamawhna hriain an chah ṭhin a, chu'ng zingah chuan sub-standard product-te hi a lo thleng tel ve ṭhin. Covid-19 laka sanitiser recommend chu alcohol tel ngei a ni," a ti a; label-ah alcohol tel angin tarlan ni mah se, a tel zat anga tarlan a tlin ngei a pawimawh thu a sawi.

Lalsawma sawi danin, mi ṭhenkhatin sanitiser siam sa chah loin a siamna hmanrua an chah a, chumi hmang chuan mithiam pawh ráwn loin an siam a, an zuar ṭhin. Hand sanitiser ṭha lo siam leh hman a nih loh nan FDA-in an en zui ṭhin a ni.

•Stay Safe (Alcohol based hand sanitiser): Aizawla siam, damdawi dawr leh hmun hrang hranga hralh chhuah a ni. A siamtute'n siam phalna an nei lo a, WHO formula an zâwm lo. Label-ah 'Isopropyl alcohol' awm anga ziah a ni a, mahse, ethanol zawk a awm tih hmuh a ni.

•Doctor's Alcohol' (Spirit for Surgical Use): Packaged drinking water búrah leh ûm danga daha zawrh hmuh a ni. A label-a a lan dan chuan, herbal drugs company pakhat Saptrishi Herbal (P) Ltd., Division of Bio Laboratory, Haryana siam a ni a; mahse, label chu ngun taka endik a nihin siam chawp leh bel chawp a ni.

•Suave Touch (Hand Sanitizer): Suave Healthcare (P) Ltd, Himachal Pradesh siam ni âwm taka an label hmang, Guwahati aṭanga damdawi dawr pakhatin a chah luh a ni. Mizoram ngenna angin Himachal Pradesh (Baddi) Drugs Control hotute'n a siamtu anga tarlan company chu FDA an endik a, product 'Suave Touch Hand Sanitizer' batch no. 1509ST chu company siam a nih loh thu leh control sample record-ah a lan loh thu an rawn hrilh.