Action plan siam dan tur sawiho

Serchhip District Health Society chu nimin khan an chairman Dr Lalrozama, Serchhip DC hoin a pisaah an
ṭhukhawm a; hmalak chhunzawm zel dan tur (action plan) duan an rêl.

Dr Lalrozama chuan, National Health Missions-in a tum pui ber chu nausen thihna leh nau chunga nu thihna tihhniam a nih thu sawiin, "Heng thil pawimawh em em pahnihte hi chhung-kaw tinte faina, thianghlimna, hriatna leh thawktute nena an inkungkaihnaahte a innghah avangin district chhunga mi tin thleng phak, harsatna tawk mek khawih pha, a hre tur dik takte hriat phak ruahmanna kan siam a ngai a ni," a ti.

Meeting-a tarlan danin, April-September 2016 chhungin Serchhip district-ah nau piang 385 an awm a, chu'ng zinga 15 chu mahni in lama hrin an ni. In lama hrin tam zawkte chuan an inah an khuaa health worker an pun hlawm. Nau piang zingah kum khat tlin hmaa thi 10 an awm a, thi zinga pathum chu in lama hrinte an ni.

Meeting chuan, nu naupai mekte'n damdawi an lak ṭhat dan te, ASHA leh health worker-te'n hna an thawh dan te, nausen thihna a tamna bik hmun te, hmanrua awm dan te, inkalpawhna leh inbiakpawhna dinhmun te, department dangte nena thawhho theihna laite leh mipui zirtir kawnga chak zawka kal theih dante an thlir a; rawtna hrang hrang awmte behchhana action plan siam an rel a ni.