Covid-19 vei Falkawna enkawl mek Sample test result a negative ta

Mizorama Covid-19 vei awm chhun, State Referral Hospital ICU-a enkawl mek chu a swab sample endik hnuhnung berah coronavirus hmuh a ni lo. La endik chhunzawm zel tur a ni a, hripui vei tawh loa ngaih theih a la ni lo.

State Referral Hospital - ZMC Bulletin nimin tlaia tihchhuah chuan, hripui vei ICU-a enkawl mek chuan hma a sâwn zel tih tarlangin, "Oxygen pawh a mamawh dan azir chauha pek a ni. Amah a harh ṭha a, a thil ei pawh a tui viau tawh a, a khumah a ṭhu chhuak peih tawh nghe nghe. A khát tâwkin a sample test reng a ni a, a sample test April 23 thlengin a la positive a, April 24-a sample lâk erawh chu a negative ta thung," a ti.

SRH-ZMC Bulletin tarlan danin, Covid-19 vei damlo chu a vei tawh lo ngei a ni tih tichiang turin a záwna darkar 24 dana sample lak pahnihte a negative ve ve a ngai a, chuvang chuan, a dinhmunah hripui a vei tawh loa puan theih a la ni lo.

ZMC Covid-19 Testing Labo­ratory-ah nimin khan swab sample endik a awm lo a, hripui vei rinhlelh dah luh an awm lo bawk. Tunah hian rinhlelh vanga dah luh mi pahnih an awm mek a ni.

Hetih lai hian, state pawn aṭanga Mizorama luhna kawngkáa screening point hrang hrangah Pathianni tlai dar leh nimin tlai dar 5 inkar khan mi 472 enfiah an ni a, chungte nen chuan enfiah tawh zawng zawng chu mi 71,145 an ni. Mizoram puma swab sample endik tawh chu mi 146 an ni a, rinhlelh vanga damdawi-ina dah luh tawh zat chu mi 30 an ni.