Haw tharte khung hran dan tur sawiho

Champhai bawrhsap mawhphurhna la mektu Mark Lalthanliana hoin nimin khan a pisaah Champhai district mi leh sa, Mizoram páwn aṭanga haw turte buaipui dan tur sawiho a ni. Rua­hman dan chuan, tun kar chhoah Manipur, Meghalaya leh Tripura-a Mizo tangkhangte haw theihna tura hmalak a ni dawn. 

Mark Lalthanliana chuan, ṭhenawm state-a tangkhang mekte an rawn haw veleh dan ang taka buaipui a nih theih nan a ṭul anga hmalak zel a nih thu leh, Champhai district-a quarantine centre-ah mamawh ṭul bikte chhawp vek a nih tawh thu a sawi.

State páwn aṭanga haw turte tana quarantine facility lo ruahman lâwk chu thil pawimawh a ni tih sawiin Mark Lalthanliana chuan, "An hriselna endik, ei leh in tur pek, venhim hna thawh leh ṭul dangte pawh dan ang thlapa kalpui a nih theih nan hmalak zel a ngai. Champhaia quarantine centre-a awm mekte pawh an chhuak zo ṭêp tawh a ni," a ti.

Meeting chuan, Mizoram páwn aṭanga hawte chu District Panchayat Resources Centre (DPRC), Keifangtlangah leh Polytechnic buil­ding, Tlangsamahte dah luh hmasak a, mamawh ang zelin centre dang pawh hman an rel a; dam lohna vanga inenkawl tura ṭhenawm state pantu medical case nei rawn hawte chu Champhai District Hospital isolation ward-ah dah rih ni se, an ti.

Meeting-ah hian Champhai SP Rex Zarzoliana Vanchhawng, SDO (Sadar) Lalnunfela Chawngthu leh sorkar official dangte an tel a ni.