Serchhipa quarantine facility sawiho
Serchhip district bawrhsap Dr Lalzirmawia Chhangte hoin nimin khan DC meeting hall-ah district chhunga quarantine facility atana ruat hmun hrang hrangte dinhmun an thlirho.
Dr Lalzirmawia Chhangte chuan, Covid-19 donaa thawktu hrang hrangte'n an tih tur ṭha taka an thawh zel avangin lawmthu a sawi a, "Tunah hian state dangah Mizoram mi leh sa tam tak tangkhang mêk an awm a, tangkhangte hi rawn haw thei ta se, he laiah an inkhung hranna tur hmunhma felfai, mamawh engkim nei sa leh thawktu pawh siam sa thlap kan lo neih a ṭul," a ti a; state páwn aṭanga lut an awmin, anmahni ina an inkhung mai theih tawh loh tur thu leh facility-a dah an nih tawh tur thu a sawi.
Meeting-ah hian Serchhip district-a hmun 17-a quarantine facility ruahmanna leh mawhphurhna hrang hrang chelhtu tura ruahmannate sawiho a ni a, siamṭhat ngaite siamṭhain, final facility list hriattirna a chhuah thuai an beisei thu an sawi. Nimin khan Serchhip district mi, state danga tangkhang zawng zawng dap khawmin an chhinchhiah ṭan a ni.