Kuminah mi pakhat kâng hlum tawh; Kângmei chhuak 178-ah FES an chê

Home minister K Sapdanga hoin nimin khan Fire & Emergency Services (FES) conference hall-ah FES hmalakna thlir let a ni a; kumin January-June chhungin mi pakhat a kâng hlum a, FES-in kângmei chhuak 178 ṭhelh hna an thawk tih tarlan a ni.

Tarlan danin, FES department-in fire station 14, kângṭhelh motor (fire tender) 47 leh kângṭhelh bike pali a nei mek. January-June 2025 chhung khan kângmei chhuak 178 ṭhelh hna an thawk a, chung zinga 15 hi in kâng niin, a bak 163 chu ram kâng a ni. Kângmei chhuak bakah hian chhanchhuah hna leh rîkrum thil dangah ṭum 26 an feh chhuak bawk.

Kuminah kângmei chhuak vangin mi pakhat a thi tawh a, kângmei chhuak vanga thil chhia zawng zawng hlut zawng chu Rs 3,58,17,930 (nuai 358) hùa chhût a ni a, kângmei lakah Rs 28,66,77,670 (nuai 2,866) hû ven him a ni thung.

Minister K Sapdanga chuan, kâng ṭhelh bakah, rîkrum thil leh chhiatna thleng danga FES hnathawhte chu hlu a tih thu a sawi a, "FES hi vantlang tana thawk tur leh chhiat tawhnaa hmatheh tura sorkarin rin ngama a rawihte kan nihna hre reng ila, he mawhphurhna rorum tak hlen chhuak tur hian mipui nena thawhhona ṭha kan neih a pawimawh," a ti.

Thlir letnaah hian FES hmalakna, harsatna leh hmachhawpte sawiho a ni a; Home Minister hian kângṭhelh leh chhanchhuah hna thawhna hmanrua leh lirtheite a enfiah nghal bawk.