CYMA-in MUHCS harsatnaah hma an la

Central YMA hruaitute chuan nimin khan Health minister Lalrinpuii a pisaah an kawm a, Mizoram Universal Heal­thcare Scheme (MUHCS) chungchang an sawipui.

CYMA chuan, YMA Central Executive Commit-tee-in a rêl tawh angin MUHCS chungchangah Mizoram sorkar leh Non-Government Hospital Association Mizoram (NGHAM) inrem lohna vanga mipuiin harsatna kan tawhte thlirin hma an la tih an tarlang.

CYMA hruaitute hian private hospital-te'n MUHCS an zawm theih loh vanga mipuiin an tawrh zel loh nan sorkar leh NGHAM hruaitute chu inhawng tak ve vea sawiho tur leh mipui tana ṭha ber ngaihtuaha hma la turin an ngen a; a ṭul a nih chuan CYMA chu hma la tura an inhawn reng thu an hrilh.

Minister Lalrinpuii chuan, MUHCS chung­changa sorkar rua­hmannate CYMA hruai­tute a hrilh a; sorkar chu biak theihin a inhawng reng a, mipuiin an tawrh lohna turin hma an lak mek thu a sawi.

Health Minister hmuhnaah hian CYMA president Lalhmachhuana leh office bearer dangte an tel a; Health Minister chu Health Secretary, Finance Secretary, Mizoram Health Care Society CEO leh official dangte'n an ṭawiawm a ni.

CYMA hruaitute hian July 4, 2025 khan NGHAM hruaitute pawh an lo kâwm tawh a ni.