KHAWTHLIR
Thisen pe
Central Higher Secondary School NSS volunteer-te chuan nimin khan Civil Hospital, Aizawl blood bank-ah thisen unit 30 an pe a, petute mipa 26 leh hmeichhia pali an ni. Central HSS hian AVBD leh Civil Hospital ngenna chhângin thisen hi an pe a, May 7, 2025 khan unit 41 an lo pe tawh bawk.
MZP-in hnam dang dap chhuah tum
MZP chuan thuchhuah siamin, Mizorama hnam dang (vai) mistiri leh Mizo hming hawha sumdawngte a ṭul anga dap chhuah an tum tih an tarlang a, "Vai mistirite hnathawh dan zirchianna neih a, contractor ang maia hnathawh an tum leh a chhawrtute duh dan aia hnam dangte duh dan Mizo mipuite'n kan zâwm dual mai hi tihtawp a nih theih nan hmalak ni se kan ti," an ti.
Lirthei paruk kâng
Model Veng, Aizawla garage pakhat chu nimin zing khawvar hma khan a kâng a, car pakhat leh two wheeler panga a kâng ral. A bula CCTV camera aṭangin mi pahnihin petrol rûk an tumna lamah kângmei a chhuak a, an ṭhelh theih loh hnuah an tlanchhiatsan a ni. Thu dawn danin, kângmei tichhuaktute hi nimin vêk khan police-in an man a, Lalduatpuia s/o Sangneihtluanga, Model Veng leh Lalsiammawia s/o Hmunsiama, Kulikawn an ni.
Ruihhlo hâl ral
Serchhip Drugs Disposal Committee chuan nimin khan Serchhip Police Station tualah kum 2024-25 chhunga ruihhlo an man chi hrang hrang, Rs 5,588,460 hû an hâl ral. Ruihhlo hâlte chu heroin gram 187, ganja kg 2.92 leh methamphetamine kg 3.880 a ni a; hâlnaah hian Serchhip SP Gavit Gogna, additional SP Saidingliana Sailo, SDO (Sadar) Rebecca Laldinmawii Hrahsel leh END officer R Lalrinsanga te an tel.
APBY chairman
July 7, 2025 aṭang khan Australia-a Baptist World Congress neih a ni a, vawiinah a tawp ang. He inkhawmpuiah hian Asia Pasific Baptist Youth vice chairman ni lai Upa Jacob Vanlalṭana Khiangte chu APBY chairman atan ruat a ni.
Ashoka Tree phun
International Year of Cooperatives (IYC) 2025 lawmna kal mekah nimin khan 'Ek Ped Maa Ke Naam' pualin Governor Gen. Dr Vijay Kumar Singh leh Cooperation minister PC Vanlalruata ten Raj Bhavan-ah thing (Ashoka Tree) an phun. 'Cooperatives Build a Better World' tih thupui hmanga IYC lawmna kal mek leh hmachhawpte bakah, pawimawh dangte an sawi dun bawk.
Two wheeler taxi rawng thlak turin ti
Lawngtlai district transport officer Margaret J Vanlalremmawii chuan thuchhuah siamin, Lawngtlai district-a two wheeler taxi rawng la thlak lote chu August 18, 2025 ral hmaa thlak turin a hriattir a; hun tiam ral hnua rawng thlak lote chu dan anga hrem an nih dawn thu a tarlang. Two wheeler taxi rawng thlak hi State Transport Authority-in February 17, 2025-a thupek a chhuah anga tih a ni.
UPC office-ah TB zirtir
State TB Cell chuan nimin khan United Pentecostal Church Mizoram Gen. Hqrs office, Zonuamah thawktute pualin ngawr (TB) chungchang inzirtirna an buatsaih. Zirhona hi Mizoram UPC general superintendent Rev. P Lalrinawma'n a kaihruai a, state TB officer Dr Zochhuanawmi'n TB chungchanga hriat tur pawimawhte leh TB donaa kohhran nena thawhho theihnate a sawi.
Dan zawm lo hriattir theih
India khua leh tuite'n ruihhlo kaihhnawiha dan bawhchhiatna - ruihhlo zawrh, tawlh ruk, siam leh a dangte awlsam taka sorkara an hriattir theihna tura duan MANAS - National Narcotics Helpline (toll free) 1933 kaltlangin dan bawhchhiatte hriattir theih a ni tih sorkar thuchhuahin a tarlang. 1933 kaltlanga report dawnte chu Narcotucs Control Bureau (NCB)-in a en zui dawn a ni.