Hnahthiala Veterinary Hospital hawn a ni

Hnahthiala District Veterinary Hospital & Laboratory leh quarters, cheng nuai 235 hmanga sak chu July 10, Ningani khan Animal Husbandry & Veterinary minister C Lalsawivunga'n a hawng a, bialtu MLA Jeje Lalpekhlua khualzahawm a ni.

Vety Hospital & Laboratory hi a dung ft. 42 leh a vâng ft. 31 a ni a, chhawng hnih a ni. Ran damdawi-in bakah hian chief veterinary officer quarters leh veterinary officer quarters sak a ni bawk.

AH&Vety Minister chuan, Hnahthial district-ah Veterinary Hospital hawn a ni ta chu sorkar hmalakna bakah, mipui thawhrimna leh ṭhahnemngaihna rah a nih thu a sawi a, "Hnahthial hi district tê ber mah ni se, district ṭhang duang leh theihna nghah tak a ni a, hospital hi tihchangtlun belh zel tum a ni," a ti.

Mizoram chu sa, artui leh bawnghnuteah a intodelh loh hle thu sawiin C Lalsawivunga chuan, "Kan intodelh theih nan ngaihtuahna tak tak kan sen a ṭul tak zet," a ti a; artuia intodelh theih nan Thenzawlah project neih tum a ni a, tender chhuah mek a nih thu a sawi.

Khualzahawm Jeje Lalpekhlua pawhin thu sawiin, tun hnaiah Ministry of North Eastern Region leh NITI Aayog-in hmarchhak district hrang hrangte Sustainable Development Goals index a tihchhuah tharah Hnahthial district pakhatna a ni chu ropui a tih thu a sawi a, "Sorkar hnathawkte inpekna vang te, NGO leh khawtlang hruaitute hna thawh ṭhat vang te, kan zavaia ṭanrualna vangte a ni," a ti.