Serchhip district-ah 2024-25 chhungin HIV vei mi 65 hmu

Serchhip district-ah sorkar kum lian ta 2024-25 chhung khan HIV vei mi 65 hmuh chhuah a ni a, chu'ng zinga mi 60 chu mipat hmeichhiatna aṭanga kai leh hriau inhman ṭâwm aṭanga kai an ni.

Serchhip District AIDS Prevention and Control Committee chu an chairman Paul L Khuma, bawrhsap hoin July 10, Ningani khan an ṭhukhawm a; HIV/AIDS dona kawnga hmalak dan leh hmachhawpte an sawiho.

Ṭhutkhawma tarlan danin, April 2024 - March 2025 chhung khan Serchhip district-ah HIV vei mi 65 hmuh chhuah an ni a, mipa 50 leh hmeichhia 15 niin, pathum chu nau pai an ni. Mi 65 zinga 30 chu mipat hmeichhiatna aṭanga kai an ni a, mi 30 dangte pawh hriau inhman ṭawm aṭanga kai an ni.

Mizoramah kum 2024-25 khan HIV vei mi 2,021 hmuh chhuah an ni a, mipat hmeichhiatna aṭanga kai 1,302 (68.13%) leh hriau inhman ṭawm aṭanga kai 559 (29.25%) an awm a; nau pai mi 110 an awm bawk.

Ṭhutkhawmah hian, tleirawl kum 13-17 zingah HIV/AIDS leh mipat hmeichhiatna aṭanga natna inkai chhâwn theihte a darh zel loh nan ngawrh taka awareness campaign kalpui an rel a; kumina pawl 8, 9 leh 11 zirlaite puala Red Ribbon Quiz buatsaih dan tur an rel bawk.