Tâng tlân chhuak la man lo

July 12, Inrinni zing dar 1:30 vel khan Central Jail, Aizawla tâng mi pahnih an tlan chhuak a, nimin tlai lam thleng khan man an la ni lo.

Vanglaini thu dawn danin, Central Jail aṭanga tlanbote hi Lianhmingthanga (36) s/o Ginzananga, Thingsulthliah leh Malsawmdawnga (28) s/o Zanhrechina, Farkawn an ni a; Lianhmingthanga hi hmeichhe pawngsual/khuaikhem (POCSO Act) thubuai nei niin, Mal­sawm­dawnga hi ruihhlo kaihhnawih (NDPS Act) thubuai nei a ni.

Tâng tlan chhuakte hian an awmna pindan (cell) ceiling tichhiain an chhuak a, rizai hmáwra iron rod kawm an dah chu jail hungna bangah vawm kaiin, lâwn liamna atan an hmang a ni. An lakah hian Zonuam Outpost-ah FIR thehluh a ni a, police-te'n zawng nghal mah se, nimin tlai lam thleng kha chuan man an la ni lo.