KHAWTHLIR

Thisen pe

July 12, Inrinni khan kohhran ṭhalai pawl pahnihin thisen pek an huaihawt. KṬP, Chaltlang South Branch chuan Synod Hospital tan thisen unit 43 an pe a, petute mipa 36 leh hmeichhia pasarih an ni a; Mizoram PYD, Lunglei South Bial leh Rahsi Veng Bial ten Lunglei Civil Hospital tan unit 17 an pe a, petute mipa 14 leh hmeichhia pathum an ni.

Drug control officer ṭha chawimawina

India ram pum huapa drugs control officer-te intêlkhawmna, Drugs Control Officers (I) Welfare Association chuan July 12, Inrinni khan Hyderabad-ah Annual Congress an hmang. Annual Congress-ah hian Mizoram sorkara Health & Family Welfare deputy director (Food & Drug Administration) R Vanlalruata, Tuithiang, Aizawl chuan Best Drug Control Officer (State) a dawng a, Mizoram aṭanga dawng hmasa ber a ni.

First aid inzirtir

Assam Rifles chuan July 12, Inrinni khan Lungpuk khuaah Lecture on First Aid an buatsaih. AR hian Lungpuk khaw mipuite chu hliam, kâng, ruh tliak leh nikhaw hreloa awmte a hlimchhawna enkawl dan zirtirin, a takin an entir nghal a ni.

Lungsenah training

Lunglei DC pisa leh Disha Foundation chuan July 11, 2025 khan Elementary English Literacy Programme (EELP) pualin primary school thlan bik 10-a English zirtirtute tan Lungsen BDO conference hall-ah training an buatsaih. EELP hi Lungsen Aspirational Block huam chhunga primary school zirlaite'n English zirnaa hma an sawn theihna tura hmalakna a ni.

Zirlai chawimawi

Lunglei West bialtu MLA T Lalhlimpuia chuan July 11, 2025 khan Lunglei College-in Mizoram University Under Graduate Exam 2025-a ti ṭhate chawimawina 'Award & Felicitation Ceremony for Outstanding Achievers 2025' an buatsaih a hmanpui. MLA hian Lunglei College aṭanga top 10-a lang mi paruk leh subject mala mark hmu sang ber mi 11 hnenah lawmpuina thuchei leh pawisa a hlan a ni.