2024-25: Hri danna pek tur zinga 95.27% pe

Mizoramah kum 2024-25 chhung khan naupang leh nu nau paite hnena hri danna pek tura ruahman 18,346 zinga 17,479 (95.27%) hnenah hri danna pek a ni a, ruahman zat aṭanga 90% tal hnena pek tura target siam chu 5%-in khûm a ni.

Natna hri lêng inkai chhâwn theih laka naupang leh nau paite invenna damdawi (vaccine) lak chungchanga hma latu State Task Force on Immunization (STFI) chu an chairman H Lalengmawia, Health secretary hoin July 11, 2025 khan Secretariat conference hall-ah an ṭhukhawm. Universal Immunization Programme (UIP) hmalakna an thlir let bakah, harsatna leh hmachhawpte an sawiho.

Health & Family Welfare department-in 'Achievement for the Year 2024-2025 (April 2024 – March 2025)' a tihchhuaha a lan danin, financial year liam ta 2024-25 chhung khan HFW department-a district pakuaah hri danna pek tura ruahman chu mi 18,346 an ni a, chu'ng zinga mi 17,479 hnenah pek niin, 95.27% a tling.

Hri danna pek tura ruahman zat aṭanga 90% tal tihlawhtling turin target siam a ni a, tihhlawhtlin tura target siam chu 5.27%-a khum a ni.

HFW district zingah Champhai district chu hri danna pek ṭhatna ber a ni a, mi 1,512 hnenah hri danna pek tura ruahman a nih laiin, mi 2,295 (151.79%) hnenah pek a ni; Serchhip district-in dawtin, 99.90% pek a ni.

Hetih lai hian, Health department district pakua zingah Siaha, Kolasib leh Lawngtlai district-ahte chuan hri danna pek tura ruahman aṭangin 90% an pe tling lo thung.

STFI ṭhutkhawma tarlan danin, hri danna la lote'n an lak loh chhan tlangpui chu - vaccine pawimawhna hriat chian tâwk loh vang te, vaccine lak tirha khawsik, etc. a awm theih ṭhin vanga lâk hreh phah te, inchiu nawn a ngaih vanga lak hreh te, social media lama intihṭhaihna vang te, thawktu indaih lohna te, inkalpawhna ṭhat tawk loh avangte a ni.

H Lalengmawia chuan, state-in a target a khûm chu lawmawm viau mah se, hmasawn ngaihna lai a awm avangin ngawrh zawka hmalak a ṭul thu leh awmze nei taka hmalak dan tur duan a pawimawh thu a sawi.

National Health Mission (NHM) mission director Dr Lily Chhakchhuak chuan, Universal Immunization Programme hnuaiah natna chi hrang 11 laka hri danna pek a nih thu a sawi a; state dangah chuan natna hri 12 huam mah se, Mizoramah chuan Japanese Encephalitis a lên ve loh avangin telh a nih loh thu a sawi bawk.

Health Services deputy director (EPI) Dr Malsawmtluangi Ralte tarlan danin, Measles-rubella hri danna pekah Mizoram a thawk ṭha a; Aizawl Civil Hospital, Zoram Medical College & Hospital, Kulikawn Sub-Divisional Hospital leh Integrated AYUSH Hospital-ahte Measles-rubella vei kum 2023 khan mi 15, kum 2024-ah 34 leh kumin 2025-ah June thla thlengin pahnih hmuh chhuah a ni.