Leilung humhalh chunga eizawnna ngelnghet siam dan tur sawiho a ni

Rural Development & Administration minister Prof. Lalnilawma chuan July 11, 2025 khan a pisaah Bhartiya Samruddhi Investments and Consulting Services Limited, Hyderabad hotute nen an inkâwm a; leilung hausakna humhalh chunga thingtlanga eizawnna ngêlnghet siam tura thawhho dan tur an sawiho.

Prof. Lalnilawma chuan, Mizoram chu ramngaw, boruak thianghlim leh lui eng emaw zat awmna a nih thu a sawi a, "Hmasawnnain a ken tel mihring khawsak ṭhan zelna avangin kan leilung hausaknate uluk taka humhalh a ṭul a, thingtlang lama eizawnna, ei leh bar hmuhna atana hmalaknate hian leilung hausakna a khawih chhiat lohna tura ruahmanna kalpui a ṭul a ni," a ti a; thingtlang lamah hmasawnna inbûk tâwk kalpui a pawimawh thu a sawi.

Inkawmhonaah hian ram leilung hausakna tichereu loa thingtlang mite tan eizawnna ngêlnghet siam dan tur te, Mizorama lui lian leh a fintu lui tête humhalh a pawimawh thu te, lui hnâr leh lui kama khawsate tan tuihna tichhe lo zawnga eizawnna siamsak dan turte sawiho a ni.

Tarlan danin, RDA department leh NEIDA ṭang dun chuan 'Project Tuihna - Dam khawchhuahna' an kalpui a, Watershed Development Component - Pradhan Mantri Krishi Sinchayee Yojana 2.0 (WDC-PMKSY) hnuaiah tuihna 1,465 an chhinchhiah aṭangin 982 an humhalh tawh a, WDC-PMKSY 3.0 hnuaiah tuihna 8,099 humhalh tura hmalak mek a ni.