Mizoram State Positive Network tlangzarh

Health & Family Welfare minister Lalrinpuii chuan July 12, Inrinni khan Aijal Club-ah Mizorama HIV/AIDS veite inzawm khawm pawl, Mizoram State Positive Network (MSPN) a tlangzarh. Minister chuan, sorkarin HIV veite'n ṭha taka ART an lak a duh thu a sawi.

Lalrinpuii chuan, HIV veite tan mahni dinhmun inpawm leh nunpui thiam a pawimawh thu sawiin, "Hma lam hun thlir thiam tura fuihtu an mamawh. Hemi atan hian an dinhmuna ding ve leh an tawn ang lo paltlang ve tawhte hi in ṭangkai dawn hle a ni. HIV hrik paite’n ṭha taka ART an lak sorkarin a ngai pawimawh a, ZMCH, Kulikawn Hospital, Synod Hospital leh District Hospital tinah a thlawna ART lak theihna centre 14 buatsaih a ni," a ti.

HIV/AIDS veite a kaihhnawih natna dang laka an him theih nan leh mi dang an kai chhàwn loh nan ART lak ṭhat a pawimawh thu sawiin Minister chuan, "Kan rama ruihhlo rawn lut nasa hian thil ṭha lo tam tak a keng tel a, HIV pawh a darh nasat phah. HIV darh zel tur ven leh inzirtir lamah sorkarin nasa takin hma a la a, MSPN pawh chak zawka ṭan la turin ka sawm che u," a ti. Mizorama ruihhlo rawn lut tur dan a pawimawh thu leh ruihhlo ti lo tura inzirtir nasat a pawimawh thu a sawi bawk.

MSACS project director Dr Jane Ralte pawhin thu sawiin, Mizorama mihring awm zat aṭanga chhûtin HIV vei 2.73% an awm mek tih a sawi a, "India ram puma a sang ber kan ni. HIV vei thar (incidence) erawh kum 2018 aṭangin an tlem tual tual. HIV hrik kaia inrinhlelhna nei an awm chuan test vat a pawimawh," a ti.

MSPN hi kum 2021 khan Lalruatfeli’n a din a, kum 2024 khan Firms & Societies-ah an inziak lut. Mizorama HIV veite an dam chhuah theihna tur te, taksa leh rilru hrisel an neih theihna tur leh khawtlanga HIV veite enhranna a reh theihna atan hma an la ṭhin a ni.