Hulhliap SSC thawh khatna zawh a ni

Mizoram sorkar, kohhran leh tlawmngai pawlte'n an buatsaih Hulhliap Short Stay Centre thawh khatna Synod Revival Camping Center, Neihbawiha neih chu July 12, Inrinni khan zawh a ni a, camper-te an chhuak.

Hulhliap SCC hi June 2025 thla chawhnu lam khan ṭan a ni a, ni 20 chhung awh a ni. Ruihhlo ti ṭhin a tawp thlenga awm chu mi 119 an ni a, mipa 105 leh hmeichhia 14 an ni. Ruihhlo laka an fihlim theih nan enkawl Pathian thu bakah, kawng hrang hranga enkawl an ni.

Inrinni khan camper-te thlahna hun hman a ni a, Hulhliap SCC Core Committee chairman Malsawmzuala Ralte leh secretary Lalhriatzuali Ralte ten an hmanpui.

Camper-te chu an in lamah an haw a, mi pathum erawh chu centre/home-ah an awm zui thung. An haw hnuah pawh a ṭul angin psychologist leh social worker mi 40 rualin an vil zui dawn a, thla thum chhung a ṭul angin an en zui dawn a ni. Damna changte tan After Care Skill Training leh Handholding hmangin hmalak chhunzawm tum a ni bawk.

Hetih lai hian, MHIP Gen. Hqrs hruaitute chu Inrinni khan Hulhliap Short Stay Centre camping neihna hmun Synod Revival Camping Center tifaiin an hnatlang a, mi 34 an thawk chhuak a ni.