Bul ṭanna ropui aiin thawhrimna leh teirei peihna a pawimawh - Agri. Minister

Agriculture minister PC Vanlalruata chuan July 11, 2025 khan Mizoram Food Processing Research and Training Centre (MFPRTC) Incubation Centre, Phaibâwkah ei siam dan zirtirna, 'Basic Food Processing Course' batch 74-na khârna a hmanpui a; bul ṭanna ropui aiin thawhrimna leh teirei peihna a pawimawh thu a sawi.

PC Vanlalruata chuan, ei siam (food processing)-ah Mizoram a ṭhang zel tih sawiin, "Mihring hian eng emaw thiam bikna kan neih loh a, kan talent kan tihpun loh chuan kan nih tur ang kan ni phâk lo ṭhin a, kan hlu tawk thei lo ṭhin. Ropui taka bul ṭan kher a ngai lo a, kan bul ṭanna chu eng pawh ni se, teirei peih leh thawhrimna a pawimawh ber," a ti a; ei leh in sawngbawlnaah rilru leh ngaihtuahna seng thar zel turin a chah.

Training hi MFPRTC huaihawt a ni a, ei siam zir thawh 74-naah hian Thentlang, Chhingchhip, Chhiahtlang, Baktawng leh Hmunṭha khua aṭangin hmeichhia 20 an tel. Pickle, theitui (juice), jam, powder, chips siam leh vawn ṭhat dan bakah, food safety chungchangte zirtir an ni.