Minister-in ZPM sorkar chhan a sawi

Minister Lalthansanga chuan, Mizoram mipui rilru puthmang siamṭhat a nih theih nan leh rualkhai zawka hmasawnna kalpui a nih theih nan kalphung thar mipui sorkar din a nih thu a sawi.

Lalthansanga hian July 12, Inrinnia ZPM Aizawl East-I Block Ṭhalaiin RT Resort-a intuaitharna an buatsaih a hmanpuinaah thu sawiin, "Sorkar kal tate'n rualkhai lo takin Mizoramah hmasawnna an kalpui ṭhin a, mi tam tak moral a chhiat phah. Kan moral siamṭhat a nih theih nan leh rualkhai zawka hmasawnna kalpui a nih theih nan kalphung thar mipui sorkar kan din a ni," a ti.

ZPM-in sorkar an siam phat aṭangin ram siamṭhat hna an thawk nghal nia sawiin Lalthansanga chuan, "Mi tinin an chanvo dik tak an chan theih nan ro kan rel mek a, Pathianin min hruaina ang zelin kan sorkar pawh kan kal thiam a pawimawh," a ti a; policy-ah din ngheh tlat tur a nih thu a sawi.