LMC huam chhungah mi 75,000 an awm

Lunglei Municipal Council (LMC) Board of Councillors (BoC) chuan LMC-a in sak leh a kaihhnawih inkaihhruaina atana Mizoram sorkarin 'The Mizoram Urban Areas Building Regulations, 2024' hmang tura a rawt chu kalpui an rêl. LMC huam chhungah mi 75,000 awm anga chhût a ni.

LMC BoC hi chairman Lalzuithanga kaihhruaiin July 11, 2025 khan an ṭhukhawm a ni. LMC-a hman atan Mizoram sorkar pawmpui tura 'The Lunglei Municipal Council Building Regulations, 2023' an thehluh chu sorkarin 'The Mizoram Urban Areas Building Regulations, 2024' hmang zawk turin a rawt a; Mizoram sorkar rawtna zûlzuiin LMC-ah Mizoram Urban Areas Building Regulations, 2024 hman an rêl a ni.

Mizoram sorkarin sorkar aṭanga hlawh la reng rengin MUHCS zawm tura tih angin LMC pisaa thawkte pawhin an hman an remti a; LMC chhunga mihring cheng leh chenna in awm zat chhinchhiahna (official data) a awm theih nan Directorate of Economics & Statistics nen thawkhoa chhiarpui (demographic census) kalpui an rel a, senso atan Rs 7,50,000 an pawm.

BoC ṭhukhawm chuan LMC tana Artificial Assistance Apps siam turin LushAlTech chu inremna ziahpui an rêl a; LushAlTech hian app hi cheng nuai 25 sêngin an siam dawn. LMC hnuaia bawlhhlawh paih man (sanitation fee) hmuh aṭanga faina hna thawktu (sanitation worker) mi pangate lawmman tihpunna tur an pawm bawk.