CM Zorama'n PM Modi hnenah Mizoram mamawhte a thlen

Prime minister Narendra Modi chuan nimin kan state hrang hrang chief minister-te video-conference hmangin Novel Coronavirus (Covid-19) léng dona leh hri léng vanga harsatnate tiziaawm tura hmalakna a sawipui. Mizoram aṭangin chief minister Zoramthanga a tel a, Mizoram sorkar hmalaknate a sawi rualin, hripui donaa hmanraw mamawhte leh suma puihna Mizoramin a mamawh thute a thlen. Chief Minister chuan inkharkhipna pawhsei zel ṭha a ti.

CM Zoramthanga chuan, Covid-19 dona atan sorkar laipui aṭangin kawng hrang hranga puihna an dawng tih a sawi a; sum leh bungraw chi hrang hrang Central aṭanga an hmuh te, mi harsa zawkte tan thla thum chhung a thlawna buhfai pek an ni te, ni 100 inhlawhna sorkar laipuiin a rawn pek avangtein lawmthu a sawi a ni.

Zoramthanga chuan, Mizo­rama hmalakna chungchangah, Covid Fund atan mipui, kohhran leh pawl hrang hrangin sum leh hmanrua an thawh khawm thu te, task force-te mipui himna atan an duty thu te, in neitute'n dawr leh in luah man an chawitir loh thute a sawi a, "Mizoram mipui inthurualna leh thawhhona a ṭha a, mi dang tan pawha entawntlak a ni," a ti.

Mizoram ṭhenawm ram leh state-ah Covid-19 vei an la awm avangin Mizoram chu inthlahdul thei a nih loh thu sawiin CM Zorama chuan, "Ramrite khauh taka ven hna kalpui zel a ngai a, paramilitary force-te leh local volunteer-te'n theihtawp chhuahin an veng mek a ni," a ti a; Mizoram mipuiin sorkar thuchhuak an zawm ṭhat thu leh state dang tan entawntlak a nih thu a sawi.

Chief Minister chuan Mi­zoram mamawh sawiin, hmanrua mamawhte leh suma puihna state-in a mamawh thu a sawi a, 'Covid-19 in ram mipui hriselna leh ei leh bar, eizawnna thlengin nasa taka min nghawng dan hre rengin, chumi mil tur chuan Disaster Relief Fund 2020-21 inkaihhruaina siam ni se,' tiin rawtna a thlen a ni.

Prime minister Narendra Modi chuan, ngai awh turin hun rei tak nghah a la ngaih a rin thu sawiin, "Natna hri hian pawi a khawih belh zel loh nan mi tinin theihtawpa invengin hma kan lak tlan a pawimawh. Tuna red zone, orange zone leh green zone ṭhen zingah green zone a pung zel a, green zone-te hi orange zone-ah an chan mai loh nan state tinte'n hma an lak a ṭul," a ti; CM-te chu sik leh sa inthlakin a ken tel natna dangte pawh ngaihtuah tel turin a chah.

Thuthar thehdarhtute zawhna chhangin Zoramthanga chuan May 3 hnu lamah chuan inkharkhipna tlema thlahdul deuh a nih tur thu sawiin, "Economic activity ṭhenkhat kan phal ang. Inkharkhip hi kalpui chhunzawm ṭha kan ti a, a chhan chu hmun tam takah dinhmun hlauhawm tak tak an la awm a ni," a ti.

Prime Minister-in nimina CM-te Covid-19 chungchanga a kawm hi a vawi lina a ni a, a hmain March 20, April 2 leh April 11-ahte a kâwm tawh. CM Zoramthanga hi Health minister Dr R Lalthangliana leh Home minister Lalchamliana ten an ṭawiawm a; chief secretary Lalnunmawia Chuaungo, DGP SBK Singh, Health secretary H Lalengmawia leh Home secretary Lalbiaksangi te an tel bawk.