Hmarchhak state palia tangkhangte Mizoram sorkarin a hruai haw dawn

Chief minister Zoramthanga chuan, April 30 aṭanga May 2 chhungin Mizoram sorkarin India hmarchhak state pali - Tripura, Meghalaya, Assam leh Manipur-a Mizo tangkhangte hruai haw a tum thu a sawi.

Chief Minister hian nimin khan thuchah tichhuakin, state ṭhen­­awma tangkhangte Mizo­ramah hruai haw theih dan tur sorkarin a ngaihtuah thu a sawi a, "Thlawhna leh réla lak ngai hmun hla zawka awmte chu a la harsa a, motor-a phurh phâk chin chu lak luh a ṭha e, tiin April 13 khan Council of Minister-in a ngaihtuah. April 15-ah India sorkarin inkhàrkhip kaihhruaina a tihchhuahah state hrang hrang inkara mipui inkal pawh a khap bur avangin he hmalakna hi a ṭhuanawp a ni," a ti.

Zoramthanga chuan, sorkar laipui dàwr chhunzawmin Minis­try of Home Affairs-in 'Phalna kan pe dawn lo a, an awmna state-te nen remruatna in siam theih chuan in inphurh haw kan hnial lo' an tih thu a sawi a, "Mizoram sorkar chuan hma a la nghal a, state palia tangkhang mi eng emaw zat lak chhuah an nih theih nan an tangkhanna state sorkar dawr a ni," tiin, state pali sorkarin rem an tih hnuah lak luh tumin sorkar a inbuatsaih thu a sawi.

April 30 - May 2 inkara lâk luh hman a nih loh chuan mamawh angin hun pawhsei a nih tur thu sawiin CM Zorama chuan, "Assam-ah mi 154, Manipur-ah mi 318, Meghalaya-ah mi 201 leh Tripura-ah mi 20, an vaiin mi 693 lak luh tum a ni. Chhung tinte'n mahni mimal thutlukna an siamna tur erawh chu kal leh a khirh viau theih avangin an fate lehkha zir chhunzawm duh tur, awm tlang law law duh zawk an awm chuan awm tlang a remchangah kan ngai," a ti.

Zoramthanga chuan, Covid-19 chu khawvel leh India ramah a la nasat viau laiin Mizoram chu a ziaawm tih sawiin, "Ram chhung state dangte nen kan inzawmna leh inkalpawhna hi tihsual chuan hlauhawmah a chang vek thei a, chuvangin, lockdown hi kalpui a ṭul. Inkhârkhip pawhsei chungchangah sorkar kalpui dan nen hmeh mil zel a ngai," a ti a; khaw chhunga duty-te an hah a, ramhnuai leh ramria duty-te an hah lehzual tih a sawi.

Chief Minister chuan, khawvel, India leh Mizoram economy dinhmun ngaihtuahin, hmabak a huphurhawm vek thu sawiin, "Nunphung pangngai­ah lut dawn pawh ni ila, kan economy dinhmun kan ngaihtuah lâwk a ngai. Mizoram hi Covid-19 awm lohna state nih thuai kan inbeisei laiin, thil tih tur pahnih kan nei a, chu'ngte chu - ramri uluk taka vên leh ei leh bar kan harsat loh nana hmalak a ni. Thlai chi thlâk a hun tawh a, mahni huan, lo leh leiletah bul ṭanin, awm khawm lút lút loin hna a thawh theih a ni," a ti.

•Mahni motor-a kalte chu an motor hmangin an haw thei ang.

•Mizorama lut zawng zawngte an in pan loin, quarantine facility-ah ni 14 an awm vek tur a ni.

•Motor nei lote hawna tur chu Assam leh Meghalaya-ah Mizoram House thuneitute leh Tripura leh Manipur-ah Mizoram sorkarin aiawh a ruatte hmangin motor ngaihtuahsak a ni dawn.

•Haw man nei lo, mangang zualte chu sorkarin a tumsak ang.

•An hawna tur district headquarters-ah ṭheuh quarantine centre ruahman a ni.

•Quarantine centre-a an luh dawnah rapid test kit hmanga Covid-19 hri an kai leh kai loh endik a ni ang. Positive an awm chuan Covid-19 vei enkawlna damdawi-inah dah luh nghal an ni ang.

•Quaranrine centre-a ni 14 an awm hnu, an chhuah dawnah endik leh vek an ni ang a, an negative chuan an inah home quarantine tura chhuahtir an ni ang.