Bazarpuia seat-te a neitu dik takin an luah theihna atan hma la dawn

Nimin khan Commerce & Industries minister F Rodingliana hoin a pisaah Aizawl Bazarpui tia hriat, Aizawl City Centre leh Aizawl City Centre Annexe sak mek dinhmun ennawn a ni a; Bazarpui seat-te chu ṭhiah a nih hmaa a neitu dik takin an luah theih nan hmalak an rêl.

Ṭhutkhawmah hian Bazarpui ṭhiah hmaa seat nei, sorkar hmasain bazarpui building sak zawh a nih huna seat pek leh tura inremna a siampui mi 1,300 chuangte chungchang ngaihtuah a ni a; sorkarin inremna a lo siampui tawhte chungchang chu endik leh vek ni se, an ti.

Sorkar dan ding lai angin Bazarpuia seat-te chu mi dang hnena hlan chhâwn emaw, hralh emaw khap tlat a nih avangin, a tira seat pek (original allotee)-te ngeiin seat an la luah em tih uluk taka endik turin an rêl a ni.

Endikna hi voter ID card leh original document hrang hrangte hmangin uluk taka tih tur a ni a, allotment neitute pawh koha interview a ni ang.

Mi dang hnena seat pe leh hralh an awm chuan tih­tawp (cancel) ni se, an ti a; ei tur zawrhna sir­a hri­selna atana ṭha lo - vaihlo, tuibûr leh a dang­te seat allotment chu a ṭul dan azira ennawn an rêl bawk.

Bazarpui building pahnih - Aizawl City Centre leh Aizawl City Centre Annexe sak mekah hian tuna ruahman dan chuan dawr 1,415 awm thei tura duan a ni a; sorkar hmasain building sak zawh a nih huna seat pek leh tura inremna a lo siampui tawh mi 1,300 chuangte chu an leng vek tura ngaih a ni.