KHAWTHLIR

Mumbai Mizoram House-a awm Covid-19 kai an hmuhchhuah zinga pakhat Nair Hospital-ah dah chu, sample test nawn a nih leh hnuah nimin khan 

a result a negative avangin 

damdawi-in aṭanga chhuahtir a ni. Mumbai aṭanga thudawn danin, Mizoram House-a awm zinga pasarih chu Covid-19 an kai tih hmuh chhuah a ni a, pahnih chu an negative leh hnuah damdawi-in aṭangin chhuah tir a ni a, pakhat dang test hnuhnung bera negative tawh test nawn leh tur a awm bawk. Covid-19 la kai mekte pawh an dinhmun a ṭha.

Chanmari Branch KṬP chuan nimin khan Synod Hospital-ah thisen unit 20 an pe a, a petute mipa 18 leh hmeichhia pahnih an ni. Chanmari KṬP hian chawlhkar liam ta khan ṭum hnih thisen an pe tawh a, ṭum thum thisen an pek chhungin mipa 53 leh hmeichhia pariatin thisen an pe. Nimin khan mimal a thlawna thisen pe pahnih an awm bawk.

Nimin zing khan C Lalramnghaka (52) s/o C Lian­sanga, Dâwn khua chu electric current-in a man avangin a thi. Thu dawn danin, C Lalramnghaka hi P&Eicity department-ah muster roll-in a thawk a, nimin zing dar 6 vel khan Dawn aṭanga Hnahthial lam km. 2 vela hlaah Hnahthial aṭanga Lunglei lama power pekna 33KV enfiaha zawm (jumpering) turin a kal a ni. A haw har avang leh a chhungte'n vawi tam tak phone-a biak an tum pawha a chhàn theih loh avangin a kalnaah an enfiah a, electric hrui a zawmna hnuaiah thiin an hmu a ni.

Covid-19 donaa hma­lakna atan nimin tlai dar 4 thleng khan Chief Minister's Relief Fund-ah mimal leh pawl pakuain Rs. 4,90,230 an thawh. 

April 24, 2020-a Chennai-a thia chhar Vivian Lalremsanga (28), Model Veng ruang chu nimin chawhnu khan an in thlenpui a ni. Vivian-a ruang zuitu Raphael AVL Malchhanhima leh lirthei khalhtu hnam dang pahnihte chu mi eng emaw zatin thilpek an hlân a, chief minister Zoramthanga pawhin Rs. 2,000 ṭheuh a hlân a ni. Raphael AVL Malchhanhima hi nimin tlai khan ni 14 chhung atan an khung hrang nghal a ni.