Kumtlingloa inneih chungchang sawiho
Directorate of Women & Child Development (WCD) chuan nimin khan Secretariat conference hall-ah kumtlingloa nupui pasal neih khapna dan, Prohibition of Child Marriage Act, 2006 chungchang sawihona, 2nd Review Meeting cum Sensitization Programme an buatsaih.
Supreme Court chuan kum 2024 khan India rama state tin chu kumtlinglo inneihna tihbo a nih theih nan hma la turin a hriattir a; chumi bawhzuina atan chuan sawihona hi buatsaih a ni. Social Welfare, Tribal Affairs, Women & Child Development department secretary Lalzarmawii'n a kaihruai a; WCD-a thawk te, Police, School Education, Law & Judicial leh State Legal Services Authority aiawhte an tel.
Mizoram State Commission for Protection of Child Rights legal officer Priscilla Lallawmsangi kaihhruaiin sensitization session hun hman a ni a; department hrang hrangte thawhhona tihchak leh khawtlang hruaitu te, police-te leh zirna-in hrang hrangte nena thawhhona ṭha neih a pawimawh thu sawi a ni.
Dan kengkawhtu leh judicial officer-te tan training buatsaih te, Special Juvenile Police Unit chungchang te, sikul zirlaibua Prohibition of Child Marriage Act chungchang telh te, Prohibition of Child Marriage Act chungchang zirtir leh zirlaite kaihruai thei tura zirtirtu hmeichhia ruatte leh thil dangte sawiho a ni bawk.