KHAWTHLIR

ATC leh AICS result a ṭha

Senate of Serampore College (University) chuan July 14, Thawhṭanni khan Bachelor of Divinity, Master of Theology leh Pathian thu zirlai dangte exam result a tichhuak a, Aizawl Theological College (ATC) leh Academy of Integrated Christian Studies (AICS)-a zirlaite an hlawhtling vek. Thu dawn danin, Senate of Serampore-in result a tihchhuahah hian ATC-a BD, MTh leh DCPC zirlaite an hlawhtling vek a; BD-ah mi 29, MTh-ah mi 31 leh DCPC-ah mi panga an ni. Baptist Church of Mizoram hnuaia Pathian thu zirna AICS zirlai - BD-ah mi 30 leh MTh-ah mi parukte pawh an hlawhtling vek bawk.

Hmanrua sem

Saitual District Disaster Management Authority hmalaknain nimin khan DC conference room-ah khuarèl chhiatna a thlena hman tur chhan chhuahna hmanraw hrang hrang sem a ni. Hmanruate chu YMA Saitual Sub-Headquarters leh Tuiphal Group, Ngopa BDO leh Phullen BDO te hnenah additional DC Lallawmawma'n a hlân.

HMV tlân theih loh

Aizawl SP Rex Zarzoliana chuan hriattirna chhuahin, Sairang leh Buichali lei inkar NH kawngpui chu NHIDCL-in an siamṭhat (PQC work) mek avangin lirthei lian (HMV) tan July 14, 2025 aṭangin zing dar 9 leh tlai dar 5 inkarah tlan phal a nih loh thu a tarlang.

Samvidhan Hatya Diwas 2025 hmang

Hnahthial bawrhsap K Vanlalruati hoin nimin khan DC conference hall-ah Samvidhan Hatya Diwas 2025 hman a ni. Bawrhsap chuan, Diwas chu kum 1975-a National Emergency puan a nih champha hriat reng nan mai ni loin, Indian Constitution hman sual a nih dan leh hman sual a nih tawh loh nana mipui inralrin reng theihna turin hman a nih thu a sawi. June 25, 1975 khan thla 21 awh emergency puan a ni a, kumin hi kum 50 a tlin cham niin, sorkar laipuia Ministry of Culture ruahmanna hnuaiah Samvidhan Hatya Diwas hi buatsaih a ni.