Mi 12 endik tharte'n Covid-19 an kai lo

Zoram Medical College (ZMC) Covid-19 Testing Laboratory-ah nimin khan mi 12-te swab sample endik a ni a, an vaiin Covid-19 an kai lo tih hmuh a ni. ZMC Covid-19 Laboratory-ah hian din a nih aṭanga nimin thleng khan swab sample 99 endik a ni tawh.

ZMC-State Referral Hospital Bulletin nimin tlaia tihchhuah chuan, niminah Covid-19 kai rinhlelh damlo dah luh thar an awm loh rualin, Make Shift ICU Ward-ah mi pahnih an awm mek thu a sawi a, "ICU-a enkawl mek Covid-19 kai damloin hma a sawn zel a, oxygen pawh a mamawh khát viau tawh.

Amah pawh a harh ṭha a, a thil ei a tui sâwt viau. A sample pawh test tura lak chhunzawm leh nghal a ni," a ti. Mizoram sorkarin ramrî-ah ZMC doctor-te duty ve tura a hriattir bawhzuiin nimin khan ZMC-a senior resident doctor-te leh ZMC-a hotute an ṭhukhawm a, an duty dan tur an rèl bakah, a ṭha thei ang bera duty hlen chhuah a nih theih nan an infuih a ni.

State páwn aṭanga Mizorama luhna hmun hrang hranga screening point-ah Thawhṭanni tlai dar 5 aṭanga nimin tlai dar 5 thlengin mi 503 enfiah an ni a, chu'ngte nen chuan enfiah tawh zawng zawng chu mi 71,648 an ni.

Mizoram aṭanga swab sample endik tawh zat chu mi 158 an ni a, a vei pakhat March 24-a hmuh chhuah bak chu vei hmuh belh an la awm lo.