Ramri uluk takin kan véng ṭhin - Assam Rifles

Assam Rifles (AR) sipaite chuan theihtawp chhuahin Myanmar leh India (Mizoram) inrìna an vên thu an sawi a, "Ramri vèn dan tur uluk takin kan duang a, chumi zûlzui chuan kan véng ṭhin," an ti.

AR sipai hotute chuan, Myanmar leh Mizoram inrina km. 510-a thui an vên thu Vanglaini palai hrilhin, "Kan ramri vên huam chhungah lirtheia inkalpawh theihna hmun 48 a awm a, chu'ngte chu uluk takin kan véng ṭhin. Ramri dinhmun hi zir chiangin, a vên dan turah ruahmanna uluk takin kan siam," an ti a; Ministry of Home Affairs (MHA) hnuaia awm an nih avangin state sorkar duh dan ang anga kal thei an nih loh thu an sawi.

Lawngtlai district-ah chuan an hna ber pakhat chu Mizoram kaltlanga ruihhlo leh rálthuam tawlhrûk tur vên a nih thu sawiin AR hotute chuan, "Myanmar ram aṭangin Mizoram kaltlangin Arakan Army hoin ralthuam leh ruihhlo tawlhrûk an tum ṭhin. Mizoram hi ralthuam leh ruihhlo tawlhrukna kalkawng a nih loh nan theihtawp kan chhuah ṭhin a ni," an ti.

Assam Rifles hotute sawi danin, Covid-19 do chu an tih tur a nih ve tho rualin, an hna ber erawh a ni thei lo. Task force tam takin ei tur leh thil dangte an dil ṭhin a, an tih tur ni lo mah se, eng emaw zat chu an pe tawh a ni.