Congress ṭhalaiin lawmthu an sawi

Congress party ṭhalai chuan nimin khan thuchhuah siamin, inkhârkhip karah ni tin inhlawhfa ṭhin kut hna­thawktute ṭanpui nan Mizoram sorkarin Mizoram Building and Other Construction Workers Welfare Board (MBOCWWB) sum aṭanga mi 40,000 hnenah ṭanpuina Rs. 3,000 ṭheuh a pe chu lawmawm an tih thu an tarlang.

MPYCC tarlan danin, February 18, 2020-a Assembly session-ah LESDE minister Lalchhandama Ralte-in kum 2019-20 inkara MBOCWWB sum hmuh zat chu Rs. 16,62,57,147 a nih thu leh sum hman tawh zat chu Rs. 16,19,80,900 a nih thu House a hrilh a; kum 2019-20 inkara sum hmuh zat leh hman tawh zat chhûtin, sum hman bàn chu Rs. 42,76,247 a ni.

Sorkarin inkhârkhip vanga inhlawh thei lo kut hnathawktute ṭanpui nan MBOCWWB sum Rs. 12,00,00,000 a hman chu Congress sorkar laia MBOCWWB-in kut hnathawktute tana sum a lo khâwl sa Rs. 11,57,23,753 a awm vang a nih thu sawiin MPYCC chuan, "Kut hna thawka eizawng, ṭanpui ngaite ṭanpui nana sum ṭhahnem tak a hmang thei hi lawmawm kan ti a, MNF sorkar hnenah lawmthu kan sawi a ni," an ti.

Congress ṭhalai chuan, MPCC president Lal Thanhawla'n Mizoram sorkara ngenna a thlen hnuah Mizoram páwna Mizoram mi tangkhangte leh Delhi-a Chin-te hnenah Rs. 5,00,000 CM Relief Fund aṭanga ṭanpuina pek a ni chu lawmawm an tih thu an sawi a; Covid-19 vanga harsatna tâwk mekte tan nasa zawka luang chhuak tur leh Mizoram economy a chhiat lohna turin nasa taka ngaihtuahna séng turin Mizoram sorkar an ngen a ni.