Nitin Gadkari hoa inkawm khawmnaah CM Zorama leh Transport Minister an tel

Union minister of Road Transport & Highways Nitin Gadkari chuan nimin khan video conference hmangin state leh union territory hrang hranga PWD leh Transport enkawltu minister-te a kâwm a; Covid-19 léng kara mipui himna tura mihring veivahna lama state hrang hrang dinhmun a sawipui. He hunah hian PWD enkawltu chief minister Zoramthanga leh Transport minister TJ Lalnuntluanga te an tel.

Meeting-ah hian state hrang hrang zingah Mizoram Chief Minister chu thu sawi tura koh hmasak ber a ni a; Zoramthanga chuan, national highway-a hmalakna khaihlak mekte chhunzawm a ṭul thu leh Mizoram sorkarin sorkar laipuia kawng siam chungchanga rawtna chi hrang hrang an thlen tawhte a sawi lang.

Transport chungchangah Zoramthanga chuan, "Mizoram chu state dang lirthei lian thil phurte'n kaltlangna atan an hman loh avangin kan vannei. Kan mamawh chin chiah lirthei intir a, kan duh chin chiah motor control theia state kilkhawra kan awm hi lehlamah chuan a vanneihthlak hle," a ti.

Chief Minister chuan, road transport vanga natna hrik inkai darh hlauhawm chungchangah Mizoramin harsatna a neih lutuk loh thu a sawi a; ramri venhimna hna uluk taka kalpui chhunzawm zel a ṭul thu te, Mizoram mipui an inlungrual thu te, state dangte tan pawh entawntlak a nih thute a sawi bawk.

Meeting-ah hian PWD leh Transport department-a officer liante an tel a ni.