ICDS-in chaw ṭha leh hmai tuamna sem

Integrated Child Deve­lop­ment Services (ICDS) East Lungdar leh Thingsulthliah project hnuaia anganwadi worker-te chuan Covid-19 vanga Mizorama inkhârkhip puan a nih aṭangin local task force-te nen ṭanghoin nu, nau pâi, nau pawm leh naupang kum 6 hnuai lamte tan anganwadi centre aṭangin chaw ṭha (supplementary nutrition) an sem chhuak ṭhin a, khaw ṭhenkhatah inah an pe ṭhin.

East Lungdar ICDS Project hnuaiah anganwadi centre 60 a awm a, anganwadi worker, helper leh task force-te nena ṭanghoin nutrition an sem ṭhin a; 'Mask for All Campaign' hnuaiah nu nau pai, nau pawm leh naupang kum 6 hnuai lamte hnenah anganwadi worker-te chuan hmai tuamna sûk theih chi 1,400 chuang ṭhuisakin an sem tawh a, task force duty-te hnenah eng emaw zat an pe bawk.

Thingsulthliah ICDS Project hnuaiah chuan anganwadi centre 95 a awm a, anganwadi worker leh helper-te'n mipui hman turin hmai tuamna 2,500 chuang an ṭhui tawh a, mi hrang hrang hnenah an sem. Anganwadi centre-ah hmai tuamna an sem bakah, kut silfai dante leh Covid-19 laka inven dante an zirtir ṭhin a ni.