MDC-in Governor thutlukna a khinnaah High Court-in thutlukna a la siam lo

Lai Autonomous District Council (LADC) chief executive member (CEM) hlui V Zirsanga, MDC ni mekin LADC chungchanga Governor thutlukna a khinna chu nimin khan Gauhati High Court Aizawl Bench-in a ngaihtuah leh a, thutlukna a siam lo.

ZPM MDC ni lai V Zirsanga hi February 27, 2025 khan CEM atan lak luh a ni a; a kaihhruai LADC sorkar chuan April 17-22, 2025 chhung khan budget session neiin, kum 2025-26 budget pawh an pawm a ni. Budget an pawm chu dan kalh tih nia sawiin Governor-in a pawm lo a, a hnâwl a ni.

Hemi hnu hian BJP leh MNF MDC-te'n United Democratic Alliance dinin, LADC-ah sorkarna an siam thei tih Governor hnenah an thlen a; Larsap pawmpuinain M Kawnpui bialtu MDC N Zangura (BJP) chu May 8, 2025 khan CEM atan lak luh a ni.

V Zirsanga hian CEM aṭanga paih a nih danah dan palzûtna a awm nia hriain, a dikna humhim a nih theih nan hma la turin Gauhati High Court-ah petition a thehlut a; High Court chuan V Zirsanga thu thlen hi ṭum thum a ngaihtuah tawh a, July 23, 2025-ah a ngaihtuah leh ang.

Tun dinhmunah High Court thu kal lai a awm avangin LADC-ah hian sorkar a kal mumal thei lo a, CEM ni lai N Zangura kaihhruai sorkar chu hna thawk thei loa dah mek a ni.