Tribal Affairs Minister-in lungphùm a phúm

Minority Affairs leh Fisheries, Animal Husbandry & Dairying enkawltu minister of state George Kurian chuan nimin khan Pradhan Mantri Jan Vikas Karyakram (PMJVK) hnuaia Siaha district-a project pahnih thawh ṭanna tur lungphùm a phúm.

Lungphùm phùmna inkhawm hi MADC Golden Jubilee Hall, Siahaah buatsaih a ni a, Siaha additional DC Abraham Beirazi Khithie-in a kaihhruai. Siaha district-a MLA pahnih Dr K Beichhua leh K Hrahmo leh mi pawimawh dangte an tel a; Union Minister hian video conference hmangin lungphùm a phúm a ni.

George Kurian chuan, prime minister Narendra Modi kaihhruaina hnuaiah India ram chu kum 2047-ah ram hmasawn (Vikshik Bharat - developed country)-ah siam tum a ni a, hmasawnna hna tam tak thawh a ni tawh tih a sawi a, "Hmarchhak state-te leh Mizoram pawh nasa taka thuam chak a ni a, ram hmasawnna turin theihtawp chhuah a ni," a ti.

Inkhawmah hian Siaha bialtu MLA Dr K Beichhua leh MADC chief executive member M Laikaw te pawhin thu an sawi.

Lungphùm phùm takte chu Tipa-V (Tuipang) khuaa Public Market cum Multipurpose Centre leh Women Facilitation Centre sak tur leh, Siahaa Multipurpose Community Hall sak turte a ni. Heng bakah hian PMJVK hnuaiah tho MADC chuan project pathum dang a thehluhte pawm a ni tawh bawk. A vaiin cheng nuai 9,000 sênna tur a ni.