MJA member thi chhungte hnenah IPR Minister-in sorkar ràlna a hlan

Nikum 2024 leh kumina Mizoram Journalists' Association (MJA) member thi mi palite sorkarin a râlna (ex-gratia) chu Information & Public Relation, Printing and Stationary minister Dr Vanlalthlana chuan nimin khan an chhungte hnenah a hlan.

Ex-gratia hlanna inkhawm hi IPR Lianchhiari Rûn Conference Hall-ah buatsaih a ni a, IPRPS secretary Betsy Zothanpari Sailo-in a kaihruai a, mi palite sûn nan ngawi rengin minute khat chhung din a ni. MJA president C Lalrambuatsaiha'n ral tur mi palite chanchin a sawi a, IPRPS Minister-in an chhungte hnenah ràlna pawisa a hlan a ni.

Dr Vanlalthlana chuan, kal khawmte chu harsatna leh manganna an tawh changin Pathian hnena tlu lut ṭhin turin a chah a, "Ani chuan kan hrehawmna zawng zawngah min thlamuan ṭhin a, harsatna, lungngaihna kan tawn changin Pathian hnenah tlûk luh nachang i hre ṭhin ang u," a ti a; MJA member thi ta chhungte a tawrhpui tak zet thu a sawi.

Sorkarin a râl takte hi MJA member an nih vek bakah, pathum chu accredited journalist an ni a; sorkarin a ràlna atan hian accredited journalist thi chhungte hnenah Rs 1,50,000 leh accredited journalist ni lo chhungte hnenah Rs 1,00,000 hlan a ni.

Ràlna inkhawmah hian mitthi chhungte pawhin thu an sawi a; IPR director C Lalnunkima'n lawmthu sawina hun a hmang bawk.