Rêl chawlhhmun tinah ILP endikna siam theih nan MZP-in hmalak an rêl

MZP chuan nimin khan an conference hall-ah Federal Council vawi 59-na an nei a; Sairang thlenga rêl a luh dawn avangin, rêl chawlhhmun (station) tinah ILP checkpoint siam a nih theih nan hmalak an rêl.

MZP Federal Council hi an vice president Dr C Lalremruata'n a kaihruai a; "Sairang thlenga rêl a lo luh dawn avangin Mizoram chhunga rêl tlânna kawng/chawlhhmunah ILP checkpoint siam a nih theih nan MZP-in hma la rawh se, an ti a ni.

National highway enkawltu NHIDCL hnathawh a ṭhat tawk loh ṭhin avangin, kawngpui a ṭhat zawk theih nan hmalak an rêl a; sorkar hnathawk pension tawh rawih nawn chungchanga MZP ngaihdan a la ngai reng tih nemnghetin, sorkar hnathawk pension tawhte rawih nawn an nih loh nan hmalak zel an rêl bawk.

MZP president H Lalthianghlima chuan, Mizo hming hawha Mizorama hnam dang sumdawnna kalpui an tam ta lutuk leh an huangtau lutuk chu MZP-in an vei thu sawiin, Mizoram hmun hrang hranga MZP-te chu a theih ang anga hnam dang hming hawha sumdawngte dap chhuak turin a chah. Sorkar hnathawk zingah an hamṭhatnain a ken tel (entitlement) aia tam lirthei kawl an awm tih an hriat thu sawiin, "A ṭul angin kan bawhzui ang," a ti.

MZP Federal Council-ah hian MZP Headquarters, sub-headquarters, branch, hnam pual zirlai pawl leh college students' union aiawhte an tel a ni.