HTE Minister-in ANC hun a hmanpui

Aizawl North College chuan nimin khan Vanapa Hall-ah zirlai tharte lawmna, Freshers' Social an hmang a, Higher & Technical Education minister Dr Vanlalthlana'n hmanpuiin, college annual magazine 'Parfung' a tlangzarh.

Dr Vanlalthlana chuan, mi hmuh loha beih fan fanna hmangin hmuh theihah chawimawina hmuh theih a nih thu a sawi a; khawvelah vawi tam tak hlawhchham hnua khawvel hriata hlawhtling ni ta tam tak an awm thu sawiin, "Hlawhchham châng pawha beidawn loh a pawimawh. Puitlinna turin a theih china kohhran leh khawtlanga inhman leh zirtirtute nena inkar ṭha neih a pawimawh," a ti.

ANC principal Dr Saroj Laldinpuii'n zirlai tharte lawmna thu a sawi a, college an kal chhan ngaihtuah chiang a, puitlinna kawng leh nun dan ṭha zirna atana hmang turin a chah. ANC awmna veng - Ramhlun North Local Council chairman Lalmalsawma Sailo-in thu a sawi bawk.

Inkhawmah hian zirna leh infiamnaa zirlai ti ṭhate hnenah chawimawina leh lawmpuina hlan a ni.