Central GST hoin GST sawiho a ni

Central GST Commissionate chuan July 15, Thawhlehni tlai khan an conference hall-ah Mizoram Merchant Association (MIMA), Mizoram Road and building Construction Association (MRBA), Mizoram Chambers of Commerce and Industries Association hruaitute leh Goods & Services Tax (GST) khawih ṭhin firm hotute GST chungchang an sawipui.

Sawihona hi Central GST joint commissioner Malsawmtluanga'n a kaihruai a, mi 22 an tel. GST chungchanga harsatnate sawiho a nih bakah, hriatthiam loh awmte inzawhfiah a ni.

MIMA tarlan danin, sawihonaah hian hnam dang contractor-te'n Mizorama hna an thawhin GST kim taka an pekna turin hmalak ni se, tia rawtna chu ṭha an ti tlang a, hmalak an rêl.

India ram hmun hrang hrang aṭanga Mizoramah GST registration an dilin, Central GST Commission-in Mizote humhalhna ILP phût loin an lo register mai ṭhin tih sawi lan a ni a; Mizoram chu hnam dangte'n economic-a an chîm ral loh nan Bengal Eastern Frontier Regulations, 1873 zûlzuiin ILP Guideline-ah hnam dang trade license dilte chu ILP kum hnih nung phût ngei tur a ni tih ziah a nih thu sawi a ni bawk. ILP chungchangah hian zir chian a, a theih anga hmalak turin thu dah a ni.

GST inzirtirna leh inhrilhfiahna a awm ṭha tawh loah an ngai a, awareness uluk leh tam zawka neih ni se, an ti a; Central GST hotute chuan a rang lama an lo bawhzui tur thu an sawi.