DC-in ramria duty post-te a tlawh

Covid-19 laka invên nana ramri depa duty-te leh Kolasib district chhung khaw ṭhenkhata task force duty-te chu nimin khan Kolasib DC Dr H Lalthlangliana'n a tlawh kual a, harsatna an neihte leh a sutkian dan turte a sawipui. Vairengte leh Bairabi screening point-a mihring phuh thianghlimna pindan leh vehicle sanitisation point-te a hawng nghal.

Dr H Lalthlangliana hian Vairengte, Phai­sen, Buhchangphai, Bukvannei, Saihapui-K, Thinglian, Pángbalkawn, Chhimluang, Meidum, Rastali leh Bairabi khuaa task force-te a kawm a; an harsatna leh mamawhte a sawipui.

Bairabi khawtlang hruaitute nen an ṭhutkhawmnaah, Mizoram páwn aṭanga mipui mamawh lak luh kawngah a theih chin chinah sorkar ruahmanna anga kal ni se, sorkarin bungraw phur luttute tana 'Declaration' buaipui vek tura ruahmanna a siam chu dik taka kalpui ni se, harsatna leh ṭul bikah chuan a hmun ṭhu task force-te'n sorkar ráwn chungin rua­hmanna an siam ṭhin ang, tiin thu dah a ni.

Kolasib Bawrhsap chuan, Covid-19 vanga harsatna a awm chin tur hriat a nih loh avang­in hmathlir thui tak neia inpuahchah thiam a pawimawh thu sawiin, "Ṭhalai tlawmngaia a ṭul huna duty hah zualte chhâwk thei turin rua­hmanna siam mek a ni," a ti a; screening point-a lirthei phuh thianghlimnaah Mizorama lut tur lirthei zawng zawng phuh vek tur a nih thu a sawi.

Task force hrang hrangte chuan, ramri depa duty-te thuam ṭhat a ṭul thu te, checkgate-a phalna nghaka lirthei tangkhang tam tak tak awm ṭhin chu khawtlang tan a him tâwk loh thute DC hnenah an lo thlen a; rua­hmanna felfai tak siam turin an ngen. DC hian ramhnuai­a duty-te hman tur solar light eng emaw zat duty-te hnenah a hlan a ni.

Duty post awm zat

Vairengte- 17

Phaisen- 8

Buhchangphai- 8

Bukvannei- 4

Saihapui-K- 2

Thinglian- 6

Pangbalkawn- 2

South Chhimluang- 2

Meidum- 2

Rajtali- 2

Bairabi- 28