Hnahthialah ramri hung sawiho

Hnahthial bawrhsap K Vanlalruati hoin July 15, Thawhlehni khan Hnahthial district huam china Myanmar ramri hung chungchangah zirchianna (survey) neih dan tur sawiho a ni a; Hnahthial SP, Assam Rifles leh Border Roads Organisation (BRO) aiawhte an tel.

K Vanlalruati chuan, Hnahthial district leh Myanmar ramri hung ni dawn ta se, ramri sei zawng leh a ram awm dan hriat chian a ṭul avangin survey tih hmasak a ngaih thu a sawi a, "Physical fencing neih a ṭul ngei em tih enfiah nan leh khaw mipui ngaihdan hriat nan survey hi neih tur a ni," a ti.

Hnahthial Bawrhsap chuan, ramri hung a nih chuan Hnahthial district chinah luhna leh chhuahna (entry-exit) point pakhat, Thingsaiah a awm dawn thu a sawi bawk.

Ruahman dan chuan, ramri hung chungchangah hian Thingsai khuaah preliminary survey neih phawt a ni dawn a, survey team-ah Hnahthial DC Office, SP Office, BRO leh Assam Rifles aiawh pakhat ṭheuh an tel ang. Preliminary survey neih a nih hnuah BRO-in survey pangngai an ti leh dawn a; Myanmar leh Hnahthial district inrina khuaahte survey neih vek tura ruahman a ni.

Mizoram leh Myanmar ramri hung tumah hian luhna leh chhuahna (entry-exit point) hmun 14-ah siam tum a ni.