Sorkar Secretary-in Lawngtlai a tlawh

Mizoram sorkara Information & Communication Technology leh Cooperation department-te changtu secretary Amit Sharma chuan nimin khan Lawngtlai a tlawh a, sorkar department hotute nen DC Conference Hall-ah an inkâwm.

Ṭhutkhawm hi Lawngtlai bawrhsap Cheemala Siva Gopal Reddy-a'n a kaihruai a; Amit Sharma chuan, Mizoram Secretariat-ah e-office kalpui a nih tawh thu sawiin, district-ahte pawh kalpui thuai a beiseiawm thu a sawi a, "Digital online platform hi mipuite'n awlsam zawka sorkar an dawr theihna tur a nih angin, theihtawp chhuah mek zel a ni," a ti.

Amit Sharma chuan, Lawngtlai district dinhmun hre chiang tur leh hmasawnna tur kawng hrang hrang awmte zir tura kal a nih thu sawiin, "Sorkar department hrang hrangte'n ṭha leh chak zawka hna an thawh theih nan ICT department-in theihtawp a chhuah ṭhin a ni," a ti a; sorkar department hrang hrangte chu thawkho thiam tur leh Lawngtlai district mipui tan theihtawp chhuah zel turin a chah bawk.

Ṭhutkhawmah hian Lawngtlaia state sorkar department hotute'n an hnathawh dan leh hmalakna tlangpui an sawi a, harsatna an neihte Amit Sharma hnenah an thlen a ni.