Champhaiah kudama buhfai bûkna endik

Champhai additional DC K Zorammuana leh district civil supply officer (DCSO) CC Sakhawliana te chuan nimin khan Champhai DCSO hnuaia Supply kudama buhfai bûknate an endik a; Legal Metrology, Champhai District Consumer Union leh Retailer Association aiawhte'n an ṭawiawm.

Buhfai bûkna endiknaah hian retailer hnena buhfai pek chhuah a nih hmain bûk a tling ngei tih finfiah nan a bûkna khawl (digital weighing scale) hmanga bûk hmasak vek a ni a; buhfai bûk tling ngeia pek chhuah a ni.

K Zorammuana chuan, sorkarin buhfai bûk tling ngei mipui hnena pek a ngaih pawimawh thu sawiin, "Mipuiin an dikna chanvo an chan theihna turin kudama thawkte'n retailer-te hnenah buhfai bûk tling ngei pe ang che u. Retailer-te pawhin bûk tling ngeia in lak chhuah theih nan uluk takin lo enpui ṭhin ang che u," a ti a; buhfai bûk tling ngei chauh lak a nih theih nan bûktir nachang hre ṭhin turin mipui a chah.

DCSO CC Sakhawliana chuan, a bûk tling ngeia buhfai lei chu mipui chanvo a nih thu te, retailer-te'n buhfai an sem dawnah a bûkna khawl (digital weighing scale) an hman ngei tur a nih thu te, bûkna khawl a chhiat palh chuan a suaha suak mai loin, beam scale hman ṭhin tur a nih thu te, digital weighing scale a chhiat chuan rang takin DCSO hnena hriattir tur a nih thute a sawi.