Khawpui tihnawktute thian turin AMC ngen

Centre For Environment & Social Justice (CESJ) chuan nimin khan Aizawl Municpal Corporation (AMC) Commissioner hnenah memorandum an thehlut a; Aizawla mipui himna leh zahawmna humhimsak tur leh, khawpui ṭawp thenfai a nih theih nan hma la turin an ngen.

CESJ chuan, AMC chhunga veng hrang hranga kawngpui kam, kea kalna (pavement)-a chawhmeh zuar zawng zawngte a bul hnai bazar in sak chhungah sawn lut vek turin AMC an ngen a; city bus ṭâwng lutuk chungchangah, "Kawng chho deuha chhe fo mai hian traffic a ti jam ngun hle a, nunphung pangngai an tikhailak tam tawh. Motor hlui tawh, a meikhu chhuah aṭanga khu dum ngen ngun chhuah ṭhin zawng zawng tlantir tawh loh ni rawh se," an ti.

AMC HNENA CESJ NGENNA DANGTE

▶ Motor nei chuan a dahna in (garage) a nei tur a ni; kawngpui sira chhun zan zawma motor riah tihtawp vek ni rawh se.

▶ Mimal sumdawng/dawrkai motor parking nei lo, an dawr kawta nilêng zankhuaa dah ṭhin hi tihtawp ni rawh se. Vantlang kawngpui mi hausate'n motor hûn nana thlabia an lei hi thil dik lo hulhual a ni a, tihtawp ni rawh se.

▶ Garage nei anga Transport-a lehkha thehlut, nei si lote hi sorkar/mipui bum an ni a, an registration cancel ngei ngei tur a ni.

▶ AMC area-a taxi stand zawng zawng enṭhat ni rawh se.

▶ Dawrkai bungraw loading leh unloading hi zing kar dar 7 hma leh zan dar 8 hnuah tih vek ni rawh se.

▶ Vantlang kawngpuia in sakna bungraw áwm khauh, iron rod, cement, brick, cubic lung, rawra leh balu te bun lawktute a rang thei ang berin an thiar fihlim tur a ni; an hnuhma an tifai ngei ngei tur a ni.

▶ Sorkar office, shopping mall lian, damdawi-in, hotel, movie theatre, conference/seminar hall-ah customer-te dâwl zo tur parking nei vek rawh se.

▶ Dawrkaite’n an dawr hma kea kalna (pavement)-a dawr bungrua an dah leh lirthei an hûng ṭhin hi khap ni rawh se.

▶ AMC area vantlang kawng kama motor/two wheeler workshop a awm leh awm loh enfiah a, mipui vantlang tana hnawkte tihtawp vek ni rawh se.