Cabinet-in MR enkawlna tur a pawm NTUM-in lawmawm thawkhatah a ngai
Council of Minister nimina chief minister Zoramthanga hoa CMO Cabinet room-a ṭhukhawm chuan, sorkara muster roll (MR)-a thawkte enkawl dan tur rawtna a pawm. MR-te intèlkhawmna National Trade Union of Mizoram (NTUM) chuan Cabinet-in a pawm tak chu lawmawm thawkhata an ngaih thu an sawi.
Cabinet chuan 'Enhancement of the quota prescribe for promotion to the post of LDC from Group D staff' tih chu an sawiho hnuah an pawm a ni. Cabinet-in a pawm tâk ang chuan, MR-te chu provisional employee tia thlâk an ni dawn. Minimum Wages Act hnuaia hlawh la ṭhin chu pay structure neiin thla tin an hlawh tur siam a ni tawh dawn a, an hlawh chu kum tin basic pay aṭangin 4%-a tihpun (annual increment) a ni tawh ang.
MR-te chuan travelling allowances, daily allowance leh transfer TA an bill thei tawh dawn a, medical allowance 4%-in an hlawhah an dawng tel tawh ang. Hmeichhe tan fa pahnih aia tam loah maternity leave chawlhkar 26 chhung an la thei dawn a, mipain paternity leave ni sarih chhung an la thei dawn bawk.
MR-te hian department-a group C leh D hna awm sate thawkin, an tan post hran siamsak a ni dawn lo. Kum khatah (calendar year) casual leave ni li an nei dawn a, chu bakah chuan anmahni ruaitute nena inremsiamnain thla tin ni khat chawlh (compulsory non-duty) an nei thei ang.
Cabinet meeting lai hian NTUM member-te chu CM bangla chhehvelah meeting thuchhuak ngaichângin an pungkhawm a, chhun dar 12 velah a náwlpui chu an ṭin darh.
Vanglaini palai zawhna chhangin NTUM president C Remtluanga chuan, Cabinet thuchhuak chu lawmawm thawkhata an hriat thu a sawi a, "Kan pun khawm chhan ber chu, kan dil belh tihhlawhtlin a nih leh nih loh a ni a, chu erawh an tihlawhtling lo. MR enkawlna dan ziaka awm hmasa ber a ni. Chutih rual chuan, nawr tur erawh a la tam mai," a ti.
MR-te enkawlna dan bakah Cabinet chuan sorkar hnathawk zinga lirthei kawl thei chin tur vehicle entitlement siam-
ṭhat leh Power & Electricity leh Public Health Engineering department-te mipui rawngbawl hna ṭha zawka an thawh theihna tura hma la turin department pahnihah task force din rawtna an pawm a ni.