Minister pahnihin pipe chhiatna tlawh

Disaster Management & Rehabilitaion minister Prof. Lalnilawma leh Aizawl West-II bialtu MLA Lalnghinglova Hmar chuan nimin khan Vaivakawn Zohnuaia lei tlahniamin Aizawl khawpui hmar lam châwmtu Greater Aizawl Water Supply Phase-III pipe a tihchhiatna an tlawh a; siamṭhat dan tur leh mipui hnena khaihlak loa tui pek dan tur an sawiho.

Tarlan danin, Vaivakawn Zohnuai lei chê hian GAWSS Phase-III pipe a tichhia a, tui a pût nasat bakah, tui pûtin lei chê a tizuala hriat a ni. GAWSS Phase-III aṭang hian ni tin tui litre nuai 100-120 pump ṭhin a ni a, tun dinhmunah tui pump tihtawp rih a ni.

Minister pahnih leh Vaivakawn khawtlang hruaitute chuan hmalak dan tur an sawiho a; Aizawl mipui tui harsatna sutkian a nih theih nan SIPMIU tui pipe chu kawng sirah kaltir rih ni se, veng chhung mite tana him leh harsatna awm lo thei ang berna tura hmalak ni se, an ti.